A Plataforma Oro No considera que o proxecto de Black Dragon Gold para extraer o ouro de Salave, en Tapia de Casariego, é “máis prexudicial” para a zona que os dous anteriores.

Tras analizar o documento de alcance de estudo de impacto ambiental que presentou a filial española da mineira australiana, Exploraciones Mineras del Cantábrico, o colectivo veciñal denunciou a “indefinición manifesta e premeditada” do escrito e criticou especialmente a proposta de verter os residuos ao mar a través dun emisario.

A asociación pregúntase “por que é necesario avaliar de novo un tipo de explotación que xa foi desautorizada no pasado por incumprir claramente a normativa” en referencia aos proxectos de Narcea Gold Mines, suspendido en 2005, e Astur Gold, informado desfavorablemente en 2014.

“CONTRA SECTORES SOSTIBLES”

“Para o beneficio único e exclusivo dunha empresa australiana que explotaría o xacemento un máximo de catorce anos – ou menos se non atopan o ouro que esperan ou o mineral baixa de prezo-,estase poñendo en risco o presente e futuro de toda unha comarca que vive da gandería, da pesca e do turismo, sectores sostibles que cada día máis se demostran como a única vía posible de futuro”, argumentan desde a plataforma.

A colectivo asegura que “seguirá opoñéndose a este tipo de proxectos seguindo con rigor, seriedade e esixindo o respecto estrito das normativas vixentes“.

A Coordinadora Ecoloxista d´Asturies tamén anunciou que presentará alegacións ao proxecto, en período de consultas previas ata o 18 de setembro.